Sogn Stiafen, emprem marter.
pdf: cheu l’entira historia
Ils 26 da december: Sogn Stiafen, emprem marter
Sur da sogn Stiafen san ins sulettamein ch’el ei staus in gediu e scolar e discipel dil grond doctur Gamaliel. Sogn Stiafen era fetg intelligents e da bien exempel. Sco quei che sogn Augustin di, ei sogn Stiafen vegnius convertius entras igl emprem priedi da sogn Pieder. Igl emprem onn suenter la vegnida dil sogn Spért, fuva el denter ils fideivels - fetg stimaus muort sia pietad e dun da far miraclas e premura da defender la cardientscha da Cristus. Entras il perdegar dils apostels carscheva il diember dils cristians di per di. Ils cartents vivevan lu sco frars e soras e partevan tut quei ch’ei vevan in cun l’auter e culs paupers.
Cun perdegar ed instruir vevan ils appostels buca pli peda da reparter las almosnas. Certins dils gedius han entschiet a murmignar che lur vieuas survegnien buca ton sco ils autes. Cheu han ils apostels cussegliau il pievel d’eleger siat umens cun bien num e pleins dil sogn Spért e sabientscha che surprendien da reparter gestamein las almosnas. Cun quels han ils apostels lu urau, mess ad els ils mauns sin lur tgau ed ordinau els diacons. Sogn Stiafen, sco emprem dils siat diacons fuva fetg premuraus da perdegar il sogn evangeli en las sinagogas e sin las plazzas publicas dil marcau.
Da quei temps deva ei a Gerusalem diversas sinagogas e scolas per tuttas naziuns. Damai che sogn Stiafen defendeva leu la cardientscha da Cristus, eis el vegnius tgisaus d’enzacons fauls students als vegls docturs dalla lescha ch‘el hagi blasfemau Moses e schizun ils dieus.
Caifas, il president da quei cussegl vul saver, sche quellas inculpaziuns seigien veras ni buc? Igl innocent diacon che tarlischava sco in aunghel, ha cun siu plaid mess avon la sontga Scartira che di, che Jesus Cristus seigi il Messias ed il ver Spindrader da siu pievel. Cun cuorts, mo clars plaids eis el era sedefendius encunter las faulsas tgisas, alzau la vusch e detg: Pievel stinau, tgaus dirs, cors sturtigliai, ureglias suordas!, tgei profet han vos vegls buca persequitau? Vus cunterscheis adina al Spért sogn, sco vos perdavons han fatg! Ils gedius sgreziavan ils dents encunter sogn Stiafen che aulza ses egls encunter tschiel ed excloma: Jeu vesel il tschiel aviert ed il Fegl dil carstgaun sin peis da vart dretga da Diu. Sin tals plaids seglian els sco tgauns ravgiai e sprunan il sogn ord il marcau tochen el liug d’encarpada. Leu fuva era Saulus ch’ei pli tard daventaus sogn Paul presents. Cheu han ei encarppau il sogn, duront ch‘el urava cun fatscha legreivla: O Segner, tegn buca a quen ad els quei puccau, mobein perduna, jeu roghel per els. Aschia eis el morts ils 26 da december digl onn 34 sco emprem marter. In di ed ina notg ei siu tgierp restaus leu giun plaun per vivonda als animals selvadis, mo quels han buca tuccau en il sogn. Discusamein ha Gamaliel satrau il sogn tgierp en ina da sias casas ordeifer il marcau.